Lutuv ming tudaa nazya & Lutuv caa a khingkhyi na

Lutuv ming tudaa nazya & Lutuv caa a khingkhyi na

Khazing ngiechiy na thueta Leching pathla khy panga taa za pathu te  kiemazaw chuoleta khyhraa hlyi caky ma viepha maryi a luthluo linaa pata Fr. AndreBareigts ta Lutuv caa malie aa zatue para. Khue a syi marue kieca ta ninghing Lutuv caa hing a hung ma a viehmuo aa?.

Vieruo Phaakang Nangdaw ttlaw pate vieryi ma tlechuo Hiekhaa Thuotluo  Sieing kungkha kie pahne Hiekhaa Thuotlu ryi ma tlechuo hyi Ingdie luo viezahlue pate Mizaw ryi ca mavie tlechuo hyi! Uvnu  zaw ma caa hing a hung vie hmuose a hungta cyi calang se mataa ung ma?.

Lutuv Khyhnaa kie /Meeting tueriy pata caa vie cape yite Hiekhaa caa se a mahmuo Byinung lie thuohla vie pathyi sa yite Hiekhaa caa se a cuo hyi. I rue syalya kie Lutuv Khyhnaa kie luo a viechiy pa tie hing (Nan dam maw? ) ma taama calikie (Nie matluo ma?) ma taama? ita cadyise ca maryi cicuo ta kuv a buo nahne nie matluo ma? Ma tahyi.

Palung hming a chiy li nazya groups lie caa Hiekhaa caa Jawsaa pangpa mataw kie Lutuv ryi Hla tue yite Lutuv hla ta a cuohyi. Phungchang thepa chekha ta Lutuv riylaa Hiekhaa ryi ta thlachuo phungri a hmuo  kama ihmung nazya Lutuv minghing Sata Sali cakaa ta cakaali ma luolue thluomang.

  

Tahema tapa kieca Email lie Heikhaa caa hmuo pate Jawsaa pangpa mataw kie Lutuv riy mahmuo Hla matue kie Lutuv hla ta maphy Meeting tuening ca Lutuv ryi  caa/thuo a pathyi sapa kie Hiekhaa caa Satlie Lesaa Khing na lubie a chang ning ca Lutuv ryi Caa  a pa phya pakie Hiekhaa caa chekha ca Hiekhaa ryita thlachuo a hmuoviepa a ma aw hyi. Unu zaw ruecie muo pachiy unglaa (Vuo ie cicuo pakha ne) ma ryi cicuo macaa cicuo ta ungsiy la khatluv tama a pha aa.

Unu zaw Ming pazaw ta ( Thiykie thiykha Hringkie hringkha ) ta yite Sipathiy a ma zaatuv pa kha rietla bietla cyili pata sekie sekha vawkie vawkha tapa siyluo cuo vama? Ruoting ruozaa ma awna cicuo ta Lutuv mingphang  mata padyi a deli pata Lutuv caa hne hla hing cyi calang ung siy.

A khingkhyi ce pa Lutuv saa ta ryiting ryizaa/ mathe a hu  hmuozya thezaw a hu Lie groups liekie Hiekhaa caa hmuola Vie groups liekie Viecaa hmuola Lutuv mingphang hrawlie kie Lutuv caa hmuo a zue ungsiy.  Cakhu taa a thyizya theriy ta Jawsaa mingpang a dawpuo pata cape pa cuovyi. Lutuv saa ta Lutuv caa hmuokhu riypa a khingkhyi na tuv a cuovie hriy.