Aa kalaadiy

Lutuv mingta Byinung si yite Hiekhaa ryita bie pungle yite saning tiydang cuo ningzaw Hiekhaa ryita thlaa a machuoh tapazaw za thyibuohrue va ang. Tahetlawmaw chuona ning cama aa latlaw pa litlaw phungchang a theviepatie bia hnehlaa a theviepatie ma paa awruv tiezawta Hiekhaa caata Byinung luo aa mazahsi ciemuoca a law aa chiy saraalaa yite palung hming ca a chiykhu vyi. Buv hrangpa natah phuvhrang patie liekie aa palesakhyi aamaa chiyhring hruo tlung. Saning uvkhutlung liekie vya Khazinglawthuo ta puopa awh hyiva.

Aavuokhaaning ta Mapaa “ Vuo Thaw Liang Paa” malie aa pahysete Byinunglie ngiechi na caazawdya ritieli ta aa mavie cape phalita khue napa ruesah. Khaapama catluv ulu a ma taraalaa aa, Lutuvmingphnag hing lungta lungli satah salih cakaa changchiy rili, ma uvta pakha papaa haatakie aakalaadiy ta riy pahing ta cuo kanaa ungpuv. Rihkhing paca vie rih lalue thluo he angla kieh Byinung liekha Lutuvmingphang sedyih lekhuopa cuohna buotuv haata Hiekhaa Thuotluo jawsaa aw ra thluo aa mang vayi ta paca a siepaalaa hyitlung.

Cadyihseca mapaa “ Vuo Thaw Ling paa “ Ngie aa buona caa pahyali nacaa ca Byinung lie Hiekhaa caata viehmuo pata a cuo, kieh Riykieh nalie Lutuvming vehve hmielie Hiekhaa riy tama a maachaw aa thlaw pachang va ang. Hiekhaa Thuotluo jawsaa riy a kierapatie bie a maachaw pa khaca phanghrang. Lutuv thukina caa malie a capepa siypa mapaa “ Vuo Thaw Ling paa” ca pahya aa chiythe vyi.

Taning ca Byinung luo zahsica Hiekhaa Thuotluo tieta malie aa ma uh nazya malie aa mahmung nazya kha Hiekhaa caata bieca viethukhyi pata acuo, cahning Lutuv caa thiythiy hringhringta aa daakhyi pa nuta “ Hmang Za Liy likieh Aa Liy ” ta Hiekhaa caa hne  lutuv caa hne uo hnaapatiy byabya aa chang ra thetli sesung hmuochuo ta. Hiekhaa Thuotluo mingphang macuothe naapaca chuothaa ryi takieh luobah!  Nahnaa nah aa tluo aa.

Duepa uvnu zaw Hiekhaa Thuotluomingphang hrawliekhieh Hiekhaa caana riy nathena khu chung hmuola Lutuv mingphang hrawliekieh Lutuv caana riy hmuothi ungla ta maahu tievyama?. Suokhah rueriy aa aw paca Hiekhaa caahing the  a hu sahra kiehca khaalie ma maacuv aa? Khykha ruokha viesaa riycuo Hiekhaa caa aa hmuopa tiehraw lie a cuv khu nata a cuvthe a awh ra.