Lutuv thuki na

Aakhawpa hlaa phungpa

Lutuv mingphang zaw ma aw napa khyruo mekaa tah malie mingphang zawta Lutuv mingphang na aa ma cuo ta patah malie aa ma pachang napa aa thabaw ca “Aakhawpa Hlaa” ma luo taa ta dyi aa cuo. Lutuv mingphang hing Thuki napa luo zaw aa hluvpuv ma hnyi na lieta aa biepuv tah ma luo vie taw pa zaw ca Luopa-ngaa (5) ta aa cuo. 

Luo ming zaw

1. Byi luo

2. Jakyi ie luo

3. Aathiy luo

4. Saa luo hne

5. Aakhawpa luo zawta aa cuo.

Luo pa-ngaa (5) hraw lieta “Aakhawpa hlaa” luo ca aa phah ce (Best), aa pathuo ce (Famous) pa hne aa ma tlechuo ce (Popular) pa luota aa cuo. 1917 kung, Saata khy, Mingpa Muo Thaa ta Zutung ruo Kaalung khy luo chechiy aa zah zaa. Luopuv (Luopang) lie aa si le nguoluo patah aa thaabuo sate Thingkhung ningdiy aa phah nalie aa pahy nguoluo patah thliy neziyliy nung aa vya hruote kharuehaa chiy pa “tingkhing ue" aa lupa ue ryi suokhah aa thyi. Aa phah sa patah naa pacung ca thingkungpa aa carie pa ue ryi ta aa cuo. Thingkung aa carie pa ue cuo kha hlaa tah aa tue.

Mingpa Muo Thaa ca Saata khy aa kieh chiy pa hneta Thutlie hne Paame (Satlie hne Lesaa) zaw aa ba (double) ta aa zah paluo sa hne yi. Mingpa Muo Thaa hlaa luo ca Saata mingnung hne mingpa zaw aa ma tlechuo ce patah aa vya li. Mingpa Muo Thaa hing “Aa” hluvpuv zaa ziy patah cuoteh "Aahluenung hne Aapuvnung" zaw hing aa lakhue lieta kuvdaw riy patah khaapa thue ma aa tiythla-aa tapa hing zaa pachang khu patah aa za cuo. “Muo Thaa hlaa” tariy pa khah Viesaa riycuo zawta sesungpaalu patah “Aakhawpa hlaa” aa ma zata patah aa cuo. 

Lutuv mingnung hne mingpa zaw phungthluvbie aa zah aw “Sesung te nah aa sung tlakhy” e za ta yi teh aa ma zah pa lu sa taw. Aa cuo baalaa patah Saata mingnung hne mingpa zaw sesungbie ca Lutuv mingphang malie aa cyicalang ce patah aa vya li mang tli. Malie aa pahy se tli pa Saata khy mingnung hne mingpa zaw cunglieh palung tluo napa aa hluvpuv i hnyi. Niema samingta Satlie LCM Paa Liy Le Khaa @ Augustine Hmun Za Lian aalaw na bie hing niema thlaapa zaw na vya thyi salah naa vya law ra thi seh. PaaKhazing patah niema thlaapa zaw diena ruolie capa aw sa thi se yi. Niema sesungpaalu bie “Aakhawpa hlaa luo” hingtah Lutuv mingphang zaw malie cyicalang pari salah aa hmang pari se. Malie aa pahy se tli pa Saata mingnung hne mingpa zaw cunglieh palung tluo napa aa hluvpuv i cahnyi yi. I caalaw hringhruo yi.

Hlaa vaa taa ang, E.......... Aakhawpa hlaa aa phah tala, aa phah li na ruo zaw aw vyi, thlaali ruoting ruozaa de tli. (Aaduedue vuo ie cicuo pakha ne).

           Niema samingta: Satlie LCM Paa Liy LeKhaa hlaa.

Mingphang duenapa hne,

Niema uvnu,

LCM Paa Liy Lekhaa,

Australia.