Blog viesaa riycuo zaw imingpa naza duenakha kierue syalya angte ikievuo chungraw lie a chie pahaa kie cape khu the va ang cuobaa laa pata chungraw lie awpa paluo sali pata aw khuva ang.
Kungcaruv hne kungcari a lala hraw ma icuotlaw a thyi pasie the vatli ang, Maning ca khyhing saata saali myithliy ta a hi ciemuo kama paata cisie riythlah pa cisie hne sa hrielie cicuo ca a pang kalang pa hne a tungsyi pahne a pya patlaw pa hing ta sahrie pangkha ta a rawle angte kama mingpa tie ingrawlie Thla Uv nung ing kielie Caletih paa itukhuo. Ma Caletih a viezawpa pavaa ming ca Cangthliy ta/Thliyli bawhbawpa/ Tliese puvnung Tliese khawpa zawta a ma viezawthe.
Cana maning ca syi myarya itu khuotli pa hingta Tliese khawpa ta a viezaw bawpha ca luvcung liehing ta Caletih paalie a zupari pahing ta a tiykha a saw ciemuo mana ca panang panang angte kaphaw ta nete kiesie pathla ihmielie ca zaa pathla lete a zatla pahne a ruochiy angte vahaa pahne ipaa,,,ipaa, ta angte pavaa isie pa ca tluo u ta u le. Iming pata tahe khamakhama na vieta pavaa na isie ee i taca vyanung vyanung viecyi viecyi mangtaa ang tate inaa lawkhyi.
Imingnung ca u te viemang na saming tana Tliese khawpa a kiesie Aapuv nung a tiy thlapa khata kie ie patie tate Aa tiythla nguoluo pa puvta na ie pa. I palung tluo nazya hing patang thei aw hela patang phuv a thluv, Vie aw hriehruv te Kalauv pavaa isie pakhaa Lelyi taa ma kie silee pata cuote mingpa luo kietlung khyi ca Aa puvnung hne Sahmaa repuv ta na ie pahyi. Cuobaalaa pata mingpa nadue nazya kha kie pachang the va nag.
I mingpa hmielie a saming ta ipalung tluo pakha na mangte a cuota khaapa puvhaa a palung a zaa tlingkhyi. Duena tapa hing imingpa ta pathiy palung chung liekha a za khung a za cape ca dyi seca mingpa duena kie pachang ninghing a cuo nachuo se thli mingpa cuota khahmuo tuehriy khu pa aw vyi cuobaalaa pata imingpa hing idue hriykhu riypa kha zaa ue vuovyi. Ningning kha ning ta a thyi angte ivuo pa hing a palung a tlingkhyi aa ta pahing iruechuo.
I mingpa hing kama cuokie ca Khazing pacuo lilie pa chuovyi Thingtlung lie ta a cuoviepa naza hle pate na ruepa mah zaw dyahing pathiy palung chunglie (tasetung) a cung siy. Imingpa hing icunglie khahmuo a ruechuo li pa duena hne na zadue Ngunung tuokaa vuo phyilie ihiy the bataa imingpa cuota khahmuo lungri pata calyi pa khupa aw vyi tapa laata zadue khu va ang palung lie za pari khu va ang. Cuobaalaa pata a duena a nanang buothluo vyi ichuochung lie a duena a hman pari aa maca imingpa icunglie a duena ca lungle liyhaa a hmang pari Blog viesaa riycuo zaw mingpa duena ca a thyi ra pa chiytie ung.
No comments:
Post a Comment