Aa hunghmuo na khiehriy vayi khaapanakaw imingphang Lutuv kaw iruetlaw Imingphang Lutuv saacuo ipalungrie ma athyi ikharue ma ahaa. Suokhah khaca hmisi iruethluo cuobaalaa patah Lutuv mingphang tudaa machiycuo nguoluo pahing ruelisa phavyi ta paca a hmisi .
Luobaa pakha: Mingnung mingpa ta Lutuv mingphang riybiekha cyiriy mingphang ca ysariy thukina cyi calang riyta Sipathiy aa maazaatuv. Hingpa tuesa nazyahing siyluo hnyite saduvthie leeciemuopa hneta khuo aa mazatyi. Salienuhlaw chuolie ta kha saduvthie zawdya kha zaatiy zaataw te tapa aa ruechuona hne mingnung mingpa zawhing thluokhue zaatla khyithlaa a malasa. Cadyiseca thesingna nata hnyirungna hing Lutuv mingcuota phanaama tariy patluv hingta atue khaapanakaw ma takieca thesingna acuvkhutaa Lutuv ruo aa palawse riyta atue viehlue kuophie khysa tungbang aa masiyre viete aa makang cuviekie Lutuv ruo pyaseriy pata acuohyi.
Luobaasuohning: Lutuv saa cuota Lutuv riylaa phaviepa
ryihrang a aw khuthemang ta va ang. Lutuv uvnu acuopa hrawlie Hiekhaa ryi nata
Hiekhaa caa ma hmuopa hingca mingnung mingpazaw saduvthie aa paradiytuv
cuosuelie ungpuv. Siebyipa tuepa Lutuv caata ma kawluozaw capethe awte
thuohlaazaw pathyi sathe a aw ratli hing. Mingnung mingpa ta Lutuv saacuo
rusungnaa ce paca thukina hing malie a huvsiy ca thukina ca siseriy pata
maanang hnawriy pata maatin tase angla tachie ma, kie saya tiezawta Lutuv mingphang
hrawlie riyhrang aa mahmuo thlachuo thepapaa ta riyhrang phungri thepapaa ta
ryihrang mangkhuopa siengaachie ta ryihrang pyizawdya group zawdya aa ma
hmuotli Lutuv ryi hen caa the na khingkie ryihrang a cuvtala ta pahaa Lutuv ryi
hne caa na thekhing kie Lutuv ryi hne caa due taala ta rase pala phahringrhuo
de ita.
Itlechuo ciemuopa suokhah ca, a nungma Lutuv a cuo aatlaw a paa
aa masaa tazawta Lutuv riy viecyi yite a
cawta a ma pahepuotluo pakha ta ithukhing na zya yica cawyi riy cuo hrahring yi
aa palee sakhyituv riyta a cuohriy. Ma thaazuohmuo
cawra sela mingnu mingpa ruca cyi calang ungsiy.