Khykha ruokha chungkha riykha viesaa riycuozawta a mari paca Khypuv natah
ruohning ruothunglie ca Lutuv ma Khyruo hneca ripuoriy cuova de. Lutuv Khyruoluo
kaa pakhaa riy taca saduvthie hnyikhu va yi. Ma pathiy palungruv phyahing
awzaalaa ta khue na paruesa. "Mingnung mingpa" ta aa maazaarue chuopa
hing macah ungnguoluo pa ningcuo hing a cuotlawmaw kieca Lutuv ruotaa Khyhrang
ruohrang pyariy pahing "Mingnung mingpa" tiehingta za pachang pacie
he yila Lutuv thukina mape maruo mangsang riy cyicalang riyta Sipathiy zaatuv
nahing aa mazatue tlawmaw.
Ruothung naluo ichiytaa nungpuv maruotie sang nalie ree ihrie
mangsyalya yi angte khuerue riy athluv. Khaama acuo tapa kieca mah mangsang na
inglie hing a muoli pata aw khu awvyi jawsaa pakha ta $ thawhning thawthung ta
aw pata acuo ree ahriepa tiehing cheekha nungpuv macuotie dueding a thepatie
taca a mahnaa panguo yite a ma palung patluo sa yite chekha hyi yica rehrie meme ta a
hriepa zaw a ma awh. Nungpuv macuotie a makhuo cicuota ingchungkhue hmaathla hing taa yite mangpa taca
ingchungkhue ciemuo pata a macuo cadyiseca chekha a masaanu zawca thlakha
luokhat hmuota nungpa awh naluo a vawkhupa a macaw. Chekha hyi yica a vawbangby
lipazaw a ma awra hyi.
Vieta ( ta ngepiang ) ta yite nungpatie chekha zaw yica
Haatiyta laa ri pasariy a maruv vie. Malie ree hriepatie zawta a makhingna
nangcuo haa ziydiy khura va yi. Cah ning chekha nungpuv macuotie ca aa pazungsue aa isue hmyilyibuo/ a nangdiy tiyhrie te a
caa hmyilyibuo/ a ma saanu zaw a maavaw ma tapa ta mingthliy hne a mangkhuo
hmyilyi buo khata a ma awh. Thiy yite iema thiyta a mathiy riy aa latuv tieta viela
yite a chuosue.
Hungma rikhu
ningningkha nama nata kamazaw nungpuv macuotie sang naluo hing chiy hrahring
vapuv tathe awhli pahaa ima chiydiy aa takhuzaw aw ravyi. Cadyiseca lieriy
mazatla na Lutuv ruoliekha mingnung mingpa chuotaa a ta nungpuv macuotie chuote
hingta ma mangkieca panglungpa buohryi
lungpa a thlung iepa zawhne mangsang khuli hmuo awrah he yila sajanung sajapaa
kuvtaa na thluokhue aa matladiy thuo aa mang. Ningtlaruo luoca iema phungpa haa a cuopapuv chuokhazaa uluo ma makha tamuo aa ma zacuolie ma taraalaa thluo yi, Cuobaalaa pata ree ihrie nalie nungpuv macuotie hing mangsyalya yi angte ingluo kaa khing yite a masaanu zaw thaalie awpa aa maa uevuo vie ngiethie tapa hmungkhu aa awh.
Lutuv ruotaama mapya Lutuv mingphang?
Lutuvruo paduo taa mazah
khungnang cawta hmisi ta pyaseh riyta tingtuona awhli paca khiehriyhmuo a
hu vapuv. Cuobaalaa pata suokha mazah ruelipa mazah pacuolipa aw kanaa, khaapa
nakawma tapa kieca ruohning ruothung luo
machiytaa maatudaa ma ningdang ma biaripa chunglie hmungkhu awh. Tahemaw tapa kieca tluore thu cuoli pahaa Lurizaw
thu hyi vapuv. Minpe phangpe riy pe thuki pe thu tathe aw hela a phasaapa.
Zaapuvmaw mapaasaa ta Biena ingtaa
ingluo maazaadiy le pahing ta Mawtaw chung sajapaa pahne bia maazaarue le
kawluoca: Paa a cuopa kama ta Minruo ryi thyidiy
vyi sajapaa pata Lutuv ryi a thediy vyi makawlie ca mapaasaa ta ma palung aa a
patling khuva puv. Kieca Kungpangaa dyi ma awhbaaning pata Lutuv ryita a
kalaadiy tapa biahing mapaasaa cunglie hmuoriy ta a tla ciemuopa bie suokhata acuo.
Hmieluo saachuo nuchuolie khyca Lutuv ryita “ A kalaa diy” tapalaa “ Maruv
ciemuo” tapa Bietuv hmuohruo maa pathu aa. Chuona
ningna a siikhyi matama kiema khing a tlawpa kiema lunghaaraa pa mata aa tlaw.
Cuobaalaa pata suokha irue paca masaa manu saming sahlaa chuolie ta ruohning ruothung
luo a vepyakhyi pa ung nungpaa tie cunglie aa maalawli kie malie aa mamawchie aa.