Mingnung hne Mingpa zaw

To,

Mingnung & mingpa zaw,

Niema tluo diy cuo vama? Kama zaw itluo pata iaw ne. Niemaa luo caapachang ta vie cape. Takung 2013 ca khungnang hyitli Khylie kieca Khycaw cuota Khyhnaa a phuvpuv ta kie pate Ingkha hnang Ingkha ta ma cahrawtaw pakha niema saming sahlaa zawta Chuelyi cung kiypaliy ma awh na ruo cicuota Khyhnaakie paca matue ra le taw. Maapha na khuchung ta Liephung hlaazaw thu pate Lutuvsaa zaw riebie khana Lutuv mingphang cyicalang na kiethaw na ta pata paavie nata uvthyi viezaw ta khuekhaa yite tluo a tlingsa  raalaa.

Khyhnaakie Ninghing ninghrang ningta ma hmuo reruokhieruo a cuona kaw catle. Khylie khaca Kungthiy cawta matue tawkha ma Khy cicuota  Dawpangaa dawcaruv ta a phuv pate maa zatue taw. Ruohrang lie a awpa Lutuvsaa zawta ca Khykhah cicuo ta cuoli tli pata Lutuv mingphang kaakaata maatue tli. Kuokhah luotaa ca a pha hringhruo Khyting khyzaa ta a pa hlaw pate mingnung mingpa zawta ma lieviehmung ungla ca niema palung a tling hringhruo tluo aa mang.

Khyhnaakie thuohlaa maa pathyisa tiyta, I maryi nata I macaa ta hmuokhu changchiyse pala tatie ung, Bienabiata (  ?  Lutuv Khyhnaakie Diypa,25 Zapuv  ) ta pata Ningthaa zaw taapuo changchiy hepuv niema palung a tlinghruo aa. Khyhnaa ningta cuo mahmuo pazaw hing a rawlie haahing ta hmuokhu he pala ca nuo,

1.       Cawna a tuediy he puv

2.      Lutuv thuki na kaw ri sepuv.

3.      Mingnungpa kaw ri sepuv.

4.     Lutuv hlaa nata Lutuv luo phangtling a zuena

5.      Cang ie nata “Bawkaw ka” Cicuo mingbaw ka” Cathyi ming baw ka a phangtling ta a zuena

6.     Mingnung mingpa paali bia hne hlaa a zuena

7.     Thuhlung muomuo baa a zuena

Mingnung mingpa ta malie niema za paru pa mekaa a zezaw tingta Khyhnaakie cuohmuo nalie ta a cuota chuo hmuokhu he pala niema palung a tlingsa thluo aa mang ita. Cuobaalaa pata Mingnung mingpa zaw, Lutuv ruolie Khyhnaakie ningta ma zatue buotlawmaw ( Va) thie pate saning pakhaw pate a chuosyi muolie khaapa a hranghrang pa ma zatuebuo tlawmaw ta heyi la ma ririy awli pata maa palakhyi hyi aa.

Mingnung mingpa zaw, Thlachuo ma liemaw lie ungciy Mingnung mingpa ryi ma tlechuoriy pa nata ma cuona maamaw liriy pata. Caa lie rikhubuo paca Mingphang hrangpa chekha ca ruo lee nalie hing thena singna a cuv yite a maruoluo a makaakhyi cahning a maruo aa kiethaw aa mata. Cabuotuv haata ruohrang a awpa nie masaanu zawta Leelyi ma mavathawh pakhaa aa Luma ma vathluh pakhaa ryarya aa saahaa tungma ma vace pakhaa aa a tapa cuoli pa pata Ningningkha Lutuv ruoluo a viekaa pakhaa khupa nata thena singna viekaa khyi pata mingnung mingpa Lutuvruo a cyi calang khutuv sanungsapaa ma cuokhu riypa thlachuo za pahrang thimya ung.  Kha I caasyituv tli kie matehing ta cuozaw se. Ca vievuo hringhruo tli yine.

Niemadue pa

Liw Maw

Tennessee USA