Thingkuotung

 

Khy khykhah lie Mingmingpa a mangsang riy aw li pata a angbyalya. Aysy hawhietuv a hnyilipa mimgmiingpa ca  ningriy baariy khuotue na a ruvtlie taa aa sajapaa aw naluo siy riy pata na aa pha aa, tate sajapaa awna Khypuv luoca a siy. Thaali zungli ta a cuotlipa mingmingpa ca, riethyi thaabuo sa pata sajapaa Ingluo ca aa chiy. A munung hne a samingta zawta palungtling sa pata a hladawh yite a tluonabia zawca aa ma ri.

Thlakha ruoruv chungca a mingmingpa hne laphakhue a dung pakhaw taw. Mingmingpa ca macuo marung a cuona buotuv haata a riemietli. Thlaluo panuo cue pakaa ta pata a pa thlachi sa ningte a diydya a rung a papya palyi diytaw, caning ningkha a ‘’sajapaa pa hne a munung’’ ca bie a reu yite ma mingmi hing Thingkuotung hne sapi pa tana a phah aa ta yite,  saca a khuo nanangta pi yite thingkuotung biekhaw a ma pa hmuosa tli.

Cuobaalaa pata mingmingpa ca palung mingthliy hmuo langra sala khaahmuo rivyi. Khylie haa a ma pakha seta a khuolie ca macuo ( bawah ) ca a cahraw. Ningkha ca a samingta hingta diedunglie taketake ta thingca a syi nguoluo, a nung hne paa ta: khaama na tuenguoluo ee paa?  Ta pata a ma khiehriy ca aw,, I nung hne paapaa mingmingpa haata nie matatheu ta niema hmuoriy thingkuotung ca syipa yi ee, a ta yica a manungvaa ta khaahmuo khuli pa yita a mingpa cunglie a matuesana tuvkha a maa kiethyi.

Viesaa riycuo uvta unta zaw Ningning khaca macuo nungpuv aa vapuv takhu aw vy. Ma ca aung hrahring riypa a cuo sajapa/saming ma zacuobuo pahaa paa a daahmang nata mingmingpa a daahmang ca  ma phara aa nakawta, a taning maatudaa na hingta masaa manu zaw cunglie bia a ri. Maatudaa a hmuokie masaa nuzaw cunglie a luote maatudaa nata ma hringzya a hmuo likie ca ma saanuzaw cunglie a luo ngiethie riypa a cuo. Mingphang nata saming sahlaa cunglie “ Duena “ a paluo sa khutuv cuokhu aa zue ungsiy!!!

Online luruo chunglieta hmungthyi pa Lutuv caata palie pathiypa a cuo.