(Valentines day) ta paca:
Valentines day ta paca: Zawmaa ingpaazaa AD 200 hrawning ta cuote Rom Riebyi tie thiy patha ning ta a zacuo. Rietuv riy padyi rue yite Zawmaa ingpaazaa kha pa lee hryly riy pata a maazaazue cahning, Rietuv hryly rieka a hu hryly Japaa cuopa bangkhuo pakiy hryly yite japaa a cuo zawdya rieka luo a ngiediy pata a zacuo. Rieka cuona (bawa) ca rietuv nataa Leesaa vievuo yite a ma nungsaazaw dyi a ma zavuo, Ingluo sikhing hryly vuona riy cu hryly tahta a zacuo ca, Riebyi tieta mahing taaca rietuv na hmaasi vyi ta pata a mazarue.
Cahning, Vuona riy chi pachung diyriy pata khue a mazakhuo Japaa ca, rietuv riy leesaa khingriy cuovyi nungsaazaw vuoriy cuovyi tapa ruena chie pahne a maruo chunglie satlie leesaa a khingpa awh vyi a chiyhie pa awh vyi ta pata ngaaphuv singphuv ta Upadi a ma zasa, A chiyhie pa, ma pachang kie a chiyhie patie leethaa pa pa, a ripa tie ta pata thiy nate ta duote pata zacuo.
Makhu taata a hunghmuo aa khingnguo vatli yi, a hlawnguo vatli yi,a chiyhie nguo vatli yi, ta pata riebyi tieta a mazarue. Ca dyiseca a maazaa rue pahaa zacuo khu vyi. Zaakhing zaadue patie kha zathlu khu va yi.
Maning hingta Satlie laasaa cuota aungtue zaari pa riypa, Lethaa pa riypa Siebyi pa '' Valentine'' zawta pahruv ta lethaa pa aa zatue pa tawyi caning, '' Siebyipa Valentine'' hing jawsaa hluvpuv ta dueding pata a zacuo. Ningning khaca Riebyi tieta ma thuohlaa hing a ma viethyi te aa tapa kha '' Siebyi pa Valentine '' ta a zaa pacuo daw ratli.
A ruhluo ta '' Valentine'' ca Rom rieka tieta a ma vie patuv sasaw, Ninglaw chiyting tuvde pata a zacuo thiyna duote a angnang tli pa hingta Riebyi pa sa janung luo '' Yuor Valentine'' ta pata caa a vie cape ca, a siyluoca: naakhing papaa hne a cukhu riy pata cathiy kuo yi, ta pata a cuo. Thaw ing a huotuv pata '' Valentine'' kha ngiechi te a zaabya. Ma cata AD 269, Pauv thla 14, ningta thiyna duote hne ta a zathiy.
'' Valentine'' thiy paca Rom Khy aa zaa cahang. Aa mangie zachiy naca Phungpa haa za ri yite '' Valentine'' Thiy hnang taata Rom riebyi tieta Upadi a ma zasiy pakha Ningkha hnag ningkha, duvsaa ta aa zavie.
Ma ningtaata Kung khahnag Kungkha ta Pauv thla 14, a chiykie Satlie leesaa zaa khing patie cuota '' Siebyi pa Valentine'' ta luv a zaapi pakha chuozaa mawkhu li riyta a zaahmang. Satlie leesaa zawta lasaw aa pi yite From your Valentine ta pata chechiy phangtling ta aa maazaapi paca a taning tacuo te hingta a cuo. Kharisaa tie lie dyi cuoli tlie pata Chuelyi cung mekaa ta pa thuote '' Valentine's Day'' ning ta pata pauv sathyi na ningta a cuo.
Pauv thla 14, ning ca AA KHINGPA TIENING ta pata a cuo.
Pa chang sana: Siilungching online Redie taa palie pachaa pataa co.