Ruothung nalie maa tawpa

Khylie ma awh ningta chungkha riykha zawta (ma bawah) cuona thyithe na hnyi yite tluotling li nazaw dya hruesue na za aw vyi. Ruohrang si hnangtaa Jawsaa pathiy palung ruv hing a cuocuo ca ciy a chiy! Rueli pacuoli pata palung riethyi maa pitaw palung riethyi aa pituv hne palung riethyi aa tawtuv pahning cuota khaahmuo thlahne na hnyivyi tapa chungkha riykha zawta aa hnyikhu vyi.

Ruohning ruothung lie aa awpa cuota Khyming chungkha riykha zawta ruvnaa na a tlung. Ruohning ruothung lie a awpa saanu zaw chungkha riykha ruvnaa na ca vie pachang the va yi a pyi ciemuo. Aa mahu pa Tuokaa paphya khu pa kiedyi thuophaa riy maataw paphya khu likie a cuona na a maw tapa ruvchung bie maataw.

Khaning ca Khycawmaw ta manung zawta sa pahuo viepa a machang tiyta khy a tlawpa saanu zaw a marue lie a maataa Pyi a chiydya ta khy a tlawpa a machungkha zawkha pyilie a maming tla pata kie hmung paluo yite ee,,, a ma awh rakieca ta yite a machungtaa vuona bie a maritaw. A tachuotaa ca Ruohning ruothung luo viehlue kuophie pa saanu zaw chungkha riykha cunglie khycawmaw sa pahuoviepa nata sungcue/aarie sa tapa a maruelie malie a taakhu va tli yi, Pyining ta a ma minghmielie a chiekhu va tlipuv.

Tuokaa malie a vie paphya khu litaaca khycawmaw sa pahuo pazaw a chang khu vapuv, Tuokaa malie a vie paphya khing litaaca cawsie pha pazaw hnyi valaa pate Pyiluo zaw chiy ra nguo aw vyi. Malie saazaw ca makha vietue makha vie calyi hmang a mavie tue khusa kiema tieca,,,, ri khingzaw aw vyi malie tatla a mala. Khycawmaw zaw malie vuo yite Pyining zaw malie aa maathyi thluomang ta paca rue nguo hrahring aw vyi.

Mingvy thluota Emial lie ca Khymingtaa bieca malie a mavietaa hyi’’a ta thlachuo cawta maacaa kiechaw yi’’ tapa mahmung naca khiehriy a hu aa vyi ma behaa diytli. Haalaw,,Haalaw,, na ryi viesie the vade kha vieri paluo anging fung vietla hyikie  mavuota a suosate na maatue na a awh litaa maacaa kiechaw hyi a vuokhaaning ta ma lie na vie paphya pakha malie malieca hmuopate a dehmuo malie aa de vyi. A maahu pa mekaa machung liehing {------------}ri yite funglie tuokaa ta malie a chuose hyi aa . A tluonabia vuona bie ri nanaw malie pi vyi tatluv ta a maatue.

Ruohrang ming chekha ca a masiy a re valaa te Khyming hne fung a chaw riypa hing a maa ngiering tapa laata a maciy tahe pala a hmuo viethluomang. Tahema tapa kieca Ruohrang mingta khyming Inn chungkhue nata chungkha riykha a maduesa tluopa kha a luokhu vyi. Ama lungtheta luokha ta chuoca Tuokaa a mapa phyakhu thluonaa pata Khyming taa cariy puo pata a cuopari pa hneca a mariy ma tueli taa a paphya pa  malu sa mahing Lutuv riyta a kalaadiy tapa biesuo hmuoce riy pata cuo ka naama tariy pata a tue.

Khyming hing fung machaw tiyta luokha tazaw chuoca thyithena matluotlingli na zawdya maruv naa nazaw thyithe na cangta ma cuota khuerue pachiy rathe se yi hela khatluvma kuovyi kuocuo a mangngie a pha tlaw.