Khyluo taa Viduokhue ma lie viepaphy  yite  i viemang ca palung aa lite khuezaw na parue sa  Khylie mahring nazya hne  viehlue kuophie naruo lie ma Khysa tungbang nayza  a thleduo nazya a lu kanaa ma ta angte  a cuocuo  ta Ruohrang lie ma awh pahing pa phasavie angte  pachiesa veining zaw a awh hyi.

Luobaa pakha ta Ruohrang lie ma awh paca masaa nu zaw Sieinng  kie yite Computer hne Mawtawkaa hnyi pate maInng  lie zaakha cuota  ningri baari  thyithyi vuosa a tling pata masang puo re hrie pate ma thlelyi ciemuo pata  hrie vapuv Laakhaa zaw ma hrie nazaa tluotling sa pata  maa hluokhu  Khyluo  Tuokaa cawta ma paphya khu mahing Ruohrang lie a phavie de nata ca a cuo.

Machung lieta rueriy hmang hluvpuv a awh,  Mawtaw hne Inng  ma hnyi paca acuzaa lie ducyi pate liesa thung pakha riypa ta a cuo re hing a cuoning buotuv haa  a ngie / pya ta pata a cuo reluo chiyhaa  re hrie cuo ningzawdya hrie khu a hu a cuoning haa maziy suekhu likie macuo ta phavyi Inng hne re a lala Mawtaw kaa ta a ruo pate  malie a ma suvsue/ma suvsue kie mingvya hluota  ma hring na a chuokhu.

Tuokaa kuoluo ta  palung riethyi na hluvpuv a awh. Thla ta tingta Bill pi a hutiy ta reepate the a hu ma pikhu likie ma cuota phavyi malie ca Khyming hne  a mawchiena hluvpuv maataw  Khyming ta Ruohrang lie ma hringnazya ma lie viepachang khu va yi. Tuokaa  ma lie a maa viehie ningta ma paphya khusue likie yica malie mawchie lieyi ta pata palung riethyi maataw. Ma awh na Ruolie ta kuokhaluo kuokhaluo pawcyi a rung.

Inngpaa Inng a kiepata biesahla phaa nacuo myarya hnyi zapuv (Zapaa) sa susi re a hrie pa tiechang chiy Ningkha taa Zaapuv ningte hrie yite Kungkha chunglie Ningkha Ninghnin dyi a maading. Khapa laata hriethyi thaabuo/hnaatluo zungtluo li ningta re mahriepuo pache pahing na papyi sa ciemuo. Khaapa khaapa mekaa tuokaa ta calyi pase.

Khylie mahring nazya ca Lu hne Leelyi taa Kungkha cuota ningkhang baakhang sa maachiy khyikie hnaanguo a chiy, Sahring Aaavaa a ziypuo pata pawcyi cuose a buv a seriy cuose tluotling tlingku Pyichiy te a khyta a dingpa ninghne baahne Khudaa lie laphakhue ma caphaw hne phiekhaw khawkha maahraw hmisi ta ma ruepakhaa kie ma tuesana nata maatu maadaa mekaa vuo a chiydiy.

Macaw taning cuohe la macang ma ciena pavaa ma byana/Byinung luo masi napa zezaw tingtie vuo a chiydiy. Haatiy macuo satlie tapa ta maci cuota ma tuesa nakha Ruohrang taa vuoriy ta zaatudaa pahaa siesaa riycuo zaw hne zuohnin rita Bawluo sipuv ruori thupuv Lungkhue luozaw sipuv mazaw dyakha vuo a chiydiy ngiethie. Ningriy baariy thyithyi suosa a calyi huli pata ninglethe baalethe a awh. Machiy cuona zawdya kha ma mang pakhaa kie a hnangtaa vuoriy ta tuechawpa awli pata a matata zaaaw pa ciediypa ta acuo.

Ma nakawta a cuocuo ca Khylie kha phavie kanaa ma taning zaw a awh.