Biekuo & Suoriy cakhiy

Naathaa lie iawh ningta icunglie na zasangpa duena  vawhe cungtaa na lubiethlung  kamacuo kie khaapa mekaa luohma na pasa mawluo ningningkha thueta mahaa hingta  vuona caa kuvtie cariy riy tama nungdue naazaatue. Vieluo ma zalang hne na pakha lunglieraw sadyithie ta zakhe khu vyinuo. Hlaa  ta sa pakie  Liepavaa nung aw viekaa la ipa hyali nung taa ang.  Cuorase la khaaning hmuo aa viekaa theli tlipa cuosungnaa zawkha phyilie cahlise libaalaa pata inaa pahlise na buotuv haa lung a liriyta zakhing raalaa va ang. Cadyiseca na biekuo kha mawkhu a chyi ngiethie aw vyi.

Kharisamaa mangda saningta Myisaa hnaa  va pahriy pate  myisaa tluolie ta a sungnaa cepa Thlakhaw biethlung kha iawh na Ruolie ta Myisaadiy ihmung kie kama khaama itue aa.  Viesaa khuvkha hyikha paame zawhne  Thluotlung tluo Hnaring Khytaa ma viepalie ningta Suotiynung  pariy angte  Suotiynung ta lungle law a thaw i khingthiy ta ri angte khingthiy ta ikhi. Cuobaalaa pata na duena sungce pahne ma Khybung te luo na zahrue ci, Cabung cakhuo luopuvlie khatluv ma narie a zathyi tlaw hmisi za pachang va ang. Mazaw kha Suotiy nung ila kie pathiy palungchunglie hrahry a kie chiepakhaa.

Kama hing thesing na hnyili tawtaa Lathli zaw phara vyi.  Cuobaalaa pata  Hnaring Civyi zuota  na lubie paruv kha tuokhaa ma mawkhuthe aa. Aa paruv ta narithluo pakha Vuotaa pacitla laa ruvvie kanaa ma ita muo pathiy palung chuelyi khingkhuo lie muo a tlata  paci ca a puruv te ciyzaw a chiy cadyiseca kama cuoca a lawna /palungtling na/ hnaanguona/ Myiding a zediyte  na lubie thlungkha ipa riy.

Kie  khaama pakhuo  ma biekhuo ca  a tling va, Jawsaa phuvpuv kha khiehriy se yi  pala a manaa tla ka luo thuo vyi. Khaapa nakaw tapa kieca  a khingpa zalang Viduo a chuo patlie na liekha Mingtaa pahne Mingtami nung aa taw pakha a makhing diy ngiethie thluomang ta pata ruena ihnyi.  Cakhutaa Suoriycakhiy cahaw khaapaa patiekha ta a ca khiy yite khaapa tiekhama aa cakhiy va yi. Biekuo hne Suoriy ta pahing a taning tacuo te ta a tliesa pata rikhu aw thluomang vyi.

Lungle viesaa riycuo zaw niema rienenung hne Biekuo a tling lipaSuoriy a cakhiy lipa chung/hrawtaa niema hyazang ku sela niema Biekuo tling se Khazing Suoriy ca cakhiy yise.