Khazingpa hne Jimi caa
Seli ca Awpase khuotaa Siybyi pa (surgeon ) kha aa hmung pahne catli sa pata a daate a khiehriy. Siybyi pa i saajapaa paca khama a lu! aa ttluovie cuo vama? Siyka cate a vietluo aa cuo vama?, Siybyi pata a ri paca Seli na sajapaa cuota aa zueciemuo raalaa pate cuothe vatli demaw zakha lie zakha palung phave.
Seli ta a ta paca aw,,, sajapaa ca matluv a panu kalie pata ma khensaa (Cancer) zawkaa a hnyi paca Khazingpa ta a caw tahmuo ta sasaa ri vatli ma vya Khazing khalie ma na awee Isajapaa ta nama kha aa cahuo ciemuo,
Siybyi pata khiehriy te Seli na sajapaa ca nama seta kaakha naataw khing ka liema? Tunaapyu sayama tie a leluo kaakha kiepya siy yite ma chungca na va mang siyli paca Seli ta Tunaapyu sayama tiekha hinghaa hing ta a chang yi isajapaa pa bia ichang nguoluo ningta a thalie na awpuo mang ungla ta yite.
A saajapaa ta puosuo ca a hiepa Tunaapyu sayama nungta a khiehriy nasaaja[aa suo hing naasang khing ma? tate Seli ta a luv a chy Sayama nung cata a sajapaa suoca caki pate palaa sati lie khungpa te aa nung Seli ca a pi. Seli ta a sajapaa Jimi ri pakha hinghaa hingta a ri isajapaa ta a ri paca a pangpasaa kha hmuona a hu nalieta na zahlu mya ung a tasiy.
Jimi hing Jawsaa zawcuota a bya a sawthei na zawdya kha a byakhing pa jawsaa ta a cuo luokha ca lezakhuo va ang. Cuobaalaa pata sajapaa Jimi ta i na chang paca inung aw kama ithiy taata suokhakha muo i hnyikhing ka liene kama haata pasa ra patie a manung hne Ningkha tachuo cuosyivie aw hne the he yise la tapa hingna ikhing ee.
Sajapaa Jimi pathiy palung ca Siyzaw Nguzaw tluvta muo a hnyi ne a viezaw palung tluona a khingtuv cuote a tuehrie thepa mekaa kha a bya a saw yi. Seli hing Thlacaruv chung Siyzong lie Jimi awpuo naca a chuona ta cuote a hie cahlung siy. A nung ca sajapaa Jimi hmangbya a cang napa (Toys) a zuvte zaw mekaa kha a kaachung luo a khungdiy. Ingluo kaari tlipa ta a kaamaw tha pahuo vyi a cuota khatluvma a ruv aa tlaw.
Nungsaa pahning dyi aw nalie pakha seta Inglie aw riyca khahmuo a tuena phavyi sajapaa Jimi hmangbya ca pachiy te a cang napa zaw mekaa kha a sangtaw nahaa a chi pakhadiy a nung ca sajapaa Jimi a ziena pangphaa cunglie vathaw pakhuv te Zuokhydyi a caa. Kaakha mingsaa pasing te a kiecha ca Caape kielie caahnaa a kadiy pa tahing a hmung caachung lie a cape paca a rawluo buotuv haahing ta a cuo.
'' Inung
Inung aw,,, navuo saaciy ta pakha na sajapaa pa changpachie ne cakhutaa kama nungkha namaw thuomang ta pata zaw khaaning hmungrue lieciy camaw buohluo va ang ne khaapa nakawmaw ma takie ca Inung caduesa ta pata nathaa lie aw puochang chiy a changhmuo ca changkhu va tli ang Ningkha hnang ningkha ca duehry lyne cakhutaa Ningningkha maataw pakhaa tazaw ta a ruechuo na ihnyi ne, Inung aw,,, kama hmiehmung cuota Haatiy pakha na mangchaw li paca , Inung nama seta duosaa kieciy kama khuolie kha awte ichechiy mekaa pila a cang nara aa. Kama cuoca khahmuo ruelie ciy cadyi seca kama haa japaasaa laata janungsaa ta namangchaw kie hmieluo nama cuozaw a phavie ne.
Kama cuota na ngiechi lie ma awnalie hing pathepahaa te a siy a kung sane. Imingnung imingpa zawta na hmung pa yihne naakhie khyi pari aa yi. Inung aw,,, malie hingca Vuocungzaa zawta nediyliy kha aw yite a maazu le pazaw kha mang angte aw ngiemang the vyi cakhutaa inung napa changtluo muolie Siebyi tiezaw kha mahmung tawpa haakha ta cuova tli yi a mahuv haa hne ling a ma hnyi sa.
Siebyi pa pakha ta pa Khazing pa hne a tawriy pata inaa chiyle Inung aw,,, kierue paluo pachiy tielaw na mingthla palie khama a cuo kama ca pa Khazing pa bawtung cunglie a tu nanaw hnyi angte bia a chaw na nawzaw ihnyi ne cakhutaa inungluo caa a cawta cape nanawzaw ihiepuo pa Khazing pa ta naw napi thuomang vyi taraalaa tluo cadyiseca Khazing ruena hne jawsaa ruena a lu lizya pa Khazingpa ta caahnaa hne bawpe na pite inungluo caa cape riypa hingta naw napi te inungta pa Khazing pa bie na zahiehriy buopa zawkha cape puoriy pata inachang.
Kama irue pa taca macaa hing Vuocungzaa nung (Gabriel) Kebare khana caazaa pi thuomang ita ne inung aw,, pa Khazingpa luo bia naza khiehie buo pakha naa thyitli ma (vya Khazing khalie ma na awee Isajapaa ta na makha aa cahuo ciemuo,) ta pata na zachang pa kha pa Khazingpa ca Haatiy zawhrawlie aw angte imangsang pari yi ne ta pata a capalie inung aw,, malie hing pa Khazingpa hne Haatiy hluvsa zaw hne aw pate manuo sa ne.
Aw inung bia a phazaw lita caa za cape pakha nama hlyitaw taa a hunghmuo hmungthe raa vayi malie tieca caahnaa hri katle tlaw pakha na aa hmung cakhaw aa khatluv ma a pha tatie kharuehaa zaw a chiy kha kieca pa Khazingpa na bawpe ipi buotli ming cazing zawna a cape khingtli ta zuoca ie malie pathuosa hlazaw ihrawraa yi.
Aw! inung chang camawnang icunglie pangpasaa riethyi na khahmuo aw va tli (Canser)khengsaa pasa nazaw aw va tli kama i nuo satli ne tahemaw tapa kieca riethyi na za angpa mekaa kha pa Khazingpa ta tluona napi diytli pa Khazingpa na mangkhu li tli nakaw ta Vuocungzaa zaw kha na zapadaw sa yi tapa kha inung thyi pasiena na hnyi thuomang tata a ruechuo nahne.
Naduepa
Nasaajapaa
Jimi
Mahing (The Little boy) cape pa a cawta Lutuv caata ma palie pathiy
No comments:
Post a Comment