Jawsaa ta hyazang paca maa aeu vuo. Hyazang sapa ta ma awkhing. Jawsaa ca zapuv khyipa Hyazang pakha maala khing. Namakha Techung lie cuoli kie kaher chunglie buotuv haata casang yi sela khaahmuo ta na khing nahaa cuokhu li pata makha teukha mahing teukha tapa ta cuose la a hunghmuo a khingpa aw vayi. Khaapa nakaw tapa kieca Jawsaa ta phavyi teukha hriekha tapa thlupa bangkhuo hing teukhing hriekhing pata a cuovie taw. A khaapa nakaw maviemang pakha kie Hyazang pakha maadaa khuo napa pathiy palung ta a cuo.
Jawsaa ta a tlaw khuna, kahre chungta pyana, palung ta a chuokhu lipa a tlaw nanaw ninglaw chiyting maataw pari. Ma a tlaw riypa bangkhuo chunglie kiema makhing pa maatlaw khu kiedyi hyazang pata a cuo. Ma hanglie ta palung khing nahne maareu chuopa tluotling khu pakha a cuo. A tlawkhu nanaw aw thluo naa pata palung khing nahne a reuchuo na tluotling khu likie hyazang pa cuohyi ravyi.
A tlawkhu nanaw dyi awte a reuchuo na tluo a tling likie '' Nakhing pa cawsie a tlaw cuobaalaa pata a la vaciy'' tapa hne a lu. Phanghrang ta mariy kie machung rawta ma khing sathluo pakha luohuo ta teukhu lipa zaw kha hyazang pa cuohyi vyi. A ngenge ta mari kieca Jawsaa hing mahuo ta a cuopa hyazang na hnyinaw a aw. Jawsaa pakha hyazang na kha a hrang jawsaa tieta patuv pakang khu awvyi. Mahing a tlaw aa pguv/phuvvyi, Mahing teuhrietluo a tla/tlavyi ta pakha jawsaa hrangpa tieta reuna luophuv a chang khu baalaa pata teu hrahring hrie hrahring tapa ta changkhu nanaw hnyivyi.
A hriepa kha a patlung nate tluotlingzaw tling lizaw a cunglie hyazang nanaw a hnyi. Hyazang ca Jawsaa cuona (bawa) cuota a biebuv hrahring. Na hyazang na palung hne hyazang sa pata a tlawkhu pata hriepa bangkhuo ca Jawsaa pakha cuona (bawa) jawsaa pakha hmieluocuo ta Ru kawluo ( သမိုင္း) kha a saakhu. A puvthepa cuona suokha ma a cape aa hmieluo cuota luopuv pha a sa aa. A mangpuo tluo tlapa muohnyi pa kawluo ma a cape aa, tpa ca jawsaa kha hyazang cunglie na aa hnang.(a muti)
Hyazang naca a pha takhu zaw awli na haata phavyi takhu zaw aw ravyi pha/phali tapa ca ma hyazang pakha tuokha tama mahmuo aa tapa cunglie kha bie a aw (a muti) Hyazang naca makhingpa mekaa kha hriekhu na thaazuo cuovyi, Hrietluo a tlapa cunglie khana thaazuo aa huyiphuv a thuv hrie a phuv tapa mekaa kha hyazang nata a khuothli pakha te hriephuv pa chunglie kha hyazang naca aa aw pakha a hu.
Thaazuo cahra na kuoluo ma mangkie ca Jawsaa ta hmang phali pa kie a mathaa a tlung a ma paruv nguo a ma chuvnguo a ma thienguo ca dyiseca Jawsaa ta ma hmangkha teuriypa cuovyi. Teukhu hriekhu pakha teuhrie nanaw pikhu hyi ravyi, Rikhing paca chechiy na paruv khu pakha nama nata paruv nanaw i hyi takhu hyi vaciy. Khapa nakaw ta ma hriekhu nanaw tapa hyazang naca hriebyipa teubyipa a phuv pa luhmaa chunglie techunglie kahre chunglie aa awpa a cuo nakaw ta a cuo. phanghrang ta ri pakie Kaamawpa sikang kha ziyli pata aw paca hyazangpa paluo sana ta cuoli pata hyazang lina tuvkha a paluosa. Kaamaw khu aw tapa hyazang naca Kaamaw pa sikang chunglie ta dyi a aw. Sesung pa hmuota a nuo nata sungpa cuoraalaa pata masung tlakhy kieca a nuona chiykhyi li pata hihaa ruvchung tuv a chiykhyi. Vuolie aa zupa Baw pavaa hmuo hyazang sa pata a zukhu/the raalaa cadyiseca a ciycuota a de tapa a hnyi luriy a hnyi ne ca kieca a cuota hyazang nakha a hmuothe tapa kha hmungkhu a aw.
Ma nakawta maka i hya aa zang tapa ta hrie cakhaw teu cakhaw ri cakhaw lipa ung pata ma kielie Jawsaa zaw minghnaa mangpuo pata kama hyazang nata ma liepa hyazang kha para seukie ungpuv sala aa hmuopa a phapa hyazang na making kie ungca hyazang luriy aa aw pakha pachang ungsiy, Ca luriy ca machunglie pari pata aa raaring pa a cuo. A khingkhyi nahing khuopuv ta ma reuli kieca hyazang na tapa lie hyazangluriy thla paca tariypa ta a li cadyi seca hmisi ta mamang kie phapa hyazang nakha a thaa patlung sate awzie a pahnyisa.
Viesaa riycuo zaw na (bawa) cuona chunglie hyazang na a hmuothe pa cuoku se.
No comments:
Post a Comment