Khyluo vuona ca

Makhy bungpuv iaw tawna luruo

Sata Ruoriy hmathla hing mangang te ipalung alite akhungcie pa hnangluoning cuosung naa pazaw kha ikiethyi pakha. Hliychaw hne Hlaw Uo phungpa ha ma pahning ta mawkhu a awli riypa duena ca kiemang ungla Sieing raw myisaa diylie chuoza mawku li na phungpa maza tuepa kha avuokhaning luona alu sa kalie. 

Sungriy bawlie ikie vuona  

Kuopele ta Khyluo kietlung angte ningkha ca a puvpa Sing Uv hne Salai LeLe/ Tlenung/ Siysie/ tapataa malie zahreu yite  "Sungriy bawluo"pining malie ama zasi khyi Bawluo ca chiy pate a awhriehruv nacaa zuoluo tiyhuo hmieriy Bung2kha ca sacade aliydaw liekha thawriy pata aviecuo Nga mangnaa paca a viebe angte tiyraw ca ivietla asyi myarya ikie ruca a mingnung palungrie a kie thyi hehehehe,

Nga ca ade myarya hmungsiy angte puvpa Sing Uv ta Bung ca aviepazu pa hne dring>>>> tate akie paring panacaa satliezaw ta siehruo tiyraw tlata ama vietla chiy paluo zuoluo sacaa lesaa zawta vie pachie yite Ngavuo luv Ngakha luv tapa ta navie re yite lesaa zawta navie cadung yica a mingnung ca amawraa adaw paluo hehehe,

Zuoluo ca "Kese kha Spikaa" hne vie pahaw yite mavieluo ciemuo biebuv pa ta khyta viesaa te Lu apuvluo maruo caridiy. Mawluo mawca ruo akhie patlaw pate ka mata "Phiebaapa" ika. Cakhaw cana ngasaa a celipa lesa Ngu Vuo ta ahmiepuo aw hriehruv pate ningkha chung Bungca thawle pate zuoluo ca sawsie vieteu pate zuokhy dyi maluo.

Khy viedyi te Innluo makiesi hluo Bungpaliy atuo kalie pa "KawKaw" Bungthaw nalie puvpa Sing Uv Salai LeLe ta pata Bung khahnang Bungkha ta ama viethaw ralaa ca pa pakhuli pata aw yite makha rue ahadiy khapa nakaw tlawmaw zapachang khu awvyi hihihi,,,

Innluo sitiy a viede te lesaa SiySiy Siykalie ca luokhyiluokhyi pate puvpa Sing Uv ta lapatla te apy paluosyi pakha hnang pakha ta akietle le pate Sungriy bawta Lunghraw tluo makiethang khyi Mathliykung hukaa kachalie Siykalie Lungpapung ca matue malieca Mithi palang ta makadiy aruvde takha aruvde madee.

Siykalie ca py pakha pate Khychung luota maliehrawkhyi zakuo akieruo patieta Nungcuozawca changpacie yite Sahmaa Zuvre Sahmyi Tiyyi tapataa malie azahla dawyite satlie chekha zawca avietawlaw khata Siylie pa innluo ca machi. Siykalie pa ta Vathu sungcaruv pata malie alawpa zuokhydyi sawsie ca matue pakha. Luohrue patie ta hlasa lipa duote tayite ka maca sacaa sara thluopata iryita pingte iryi athyi li nakaw ta duote caa nate yi aphnagphang na paluo sayi. 

Ca ari tuv Khyluo vuona apevie ku salaa makaw hing zingmaa myarya tlite ningthla zaw athyi khu vatli laa angte athyi zyatuv nathe pathi mang ungla.